sol-tech logo
mediaverklaring foto

Sol-Tech betree nuwe era met toevoeging van IT-opleiding

Sol-Tech kondig met trots aan dat die instelling in 2023 sy opleidingsaanbod vergroot deur inligtingstegnologie-opleiding by die bestaande ambagsopleiding te voeg. 

Sol-Tech spits hom sedert 2007 daarop toe om gehalte ambagslui aan die industrie te lewer. Volgens besturende direkteur, Paul van Deventer,  is Sol-Tech se visie vanuit die staanspoor om jongmense indiensneembaar te maak en só ’n goeie toekoms vir hulle te skep. “Navorsing toon duidelik dat daar ’n reusetekort aan gehalte IT-opleidingsinstansies en -personeel in Suid-Afrika is. As beroepsopleidingsinstansie betree ons nou ’n nuwe era met dié uitbreiding. Dit bring ons ook nader aan die verwesenliking van ons visie.” 

Alhoewel Sol-Tech ’n nuwe opleidingsveld betree, gee Van Deventer die versekering dat hierdie uitbreiding ook op dieselfde Sol-Tech-grondbeginsels van die afgelope vyftien jaar geskoei is. Sol-Tech-studente vaar uitstekend in die werkplek omdat hulle industrie-relevante praktiese opleiding as deel van ’n verrykte kurrikulum ontvang, met uitstekende fasiliteerders wat dit aanbied. Die ontwikkeling van sagte vaardighede is ook ’n prioriteit.

Sol-Tech se toetrede tot die inligtingstegnologie-veld ontsluit verskeie opleidingsmoontlikhede en -rigtings binne ’n baie dinamiese omgewing. Virtuele laboratoriums maak opleiding uiters toegangklik met verskeie programme wat aan skoolverlaters geleenthede bied, asook aan mense wat reeds in die industrie werk en verdere ontwikkeling wil doen. Die snelle vooruitgang in die tegnologiese wêreld maak opleiding in infrastruktuur, sagtewareontwikkeling, kubersekuriteit en data gewild en uiters relevant. Studente kan aanvanklik uitsien na programme wat op drie areas fokus, naamlik data-en wolk, IT-ondersteuning en -netwerk en kubersekuriteit. Verdere uitbreidings sal later volg. 

Sol-Tech het spesifiek die internasionaal erkende CompTIA (the Computing Technology Industry Association) as opleidingsvennoot gekies. CompTIA se programme geniet 

internasionale erkenning en word in die industrie hoog geag. Só word studente verseker van uitstekende onderrig.   

Volgens Van Deventer kan die eerste studente reeds in April met studies begin, waarna daar deurlopende innames sal wees. Studente kan daarna uitsien om die programme aanlyn te voltooi, met die toegevoegde waarde van blokweke in die goed toegeruste laboratorium op die Sol-Tech-kampus in Monumentpark.

“Ons is baie opgewonde om hierdie volgende fase te betree,” beaam Van Deventer. 

Sol-Tech is in 2007 gestig om studente met kritieke en skaars vaardighede toe te rus. Agt ambaggerigte kwalifikasies word tans aangebied, naamlik vir elektrisiëns, dieselwerktuigkundiges, meulmakers, gereedskapmakers, passers-en-draaiers, megatroniese tegnici, outo-elektrisiëns en sweisers.

Nog nuus